🌼 ज्ञानेश्वरी अध्याय नववा राजविद्या राजगुह्य योग : निवडक ओव्या🌼
॥ प्रचलित मराठीत काव्यबद्ध॥
 |
| भावार्थ ज्ञानेश्वरी अध्याय नववा - राजविद्या राजगुह्य योग ( निवडक ओव्या) |
dnyaneshwari adhyay 9
राजविद्या राजगुह्ययोग - निवडक ओव्या ( प्रचलित मराठीत )
..............🌿🌹🌿.............
अवधान एकवेळ दीजे ।
मग सर्व सुखासी प्राप्त होईजे ।
हे प्रतिज्ञोत्तर माझे ।
उघड ऐका ॥ १ ॥
तैसे प्रथम कामना त्यागणे।
नि मग ज्ञानाची भेट घेणे ।
ऐसे ज्ञानाचे अनुभवणे ।
पडे अर्जुना ॥५०॥
मीपणाची झोप मोडो।
स्वरूप बोधाचे कवाड उघडो ।
गाठ ती तुझी पडो ।
तुझी तुझ्याशीच ।।१६।।
मन बुध्दी शब्दा कारणे ।
ज्ञान कळले ऐसे वाटणे ।
परि मृगजळाच्या त्या ओलाव्याने ।
अंकुर नाही ।। १३७ ।।
जे स्थूल दृष्टीने देखती ।
ते मज प्रतितीस चुकती ।
स्वप्नी जे अमृत पिती ।
ते भ्रमित अर्जुना । । १४४ ।।
जे मज नामरूपी मानती ।
ते मज प्रतितीस चुकती ।
ते चंद्रबिंब धरिती ।
जळी जेवी ॥ १५० ॥
रागद्वेषाच्या कारणे ।
तयांचे अज्ञानी रमणे ।
भ्रमासी सत्य मानणे ।
घडे तेथे।। १८३ ।।
मन बुध्दिच्या कुंडात ।
ज्ञानाग्नी होऊ द्यावा प्रदीप्त ।
अवधानी समत्व धरत ।
ब्रम्ह व्हावे।। २४१।।
मनी विवेक धरून ।
अंतरी अवधान साधून ।
ज्ञानास उपलब्ध होणं ।
यज्ञ अर्जुना।।२४२ ।।
स्वतःच अमृत असून ।
आपले आपल्या विस्मरण।
मग स्वतःसी मर्त्य मानणं।
दुर्दैव ते ॥३०३ ।।
मनी इच्छा धरून ।
भजन पूजन होणं ।
ते पापच की करणं ।
पुण्य समजून।।३१२।।
जाणून घे अर्जुना ।
या पापपुण्य व्दैत कल्पना।
स्वर्ग आणि नरक दोहोंना।
त्यागणे हिताचे।।३१५ ।।
मातेच्या उदरात ।
नि विष्ठेच्या संगतीत ।
नऊ मास हाल भोगीत ।
अडकती भवचक्री ॥ ३३१॥
मी जाणले ऐसे म्हणतो ।
तो काहीच न जाणतो ।
जो मोठेपणा मिरवतो ।
तो काहीच नाही ॥३६८।।
विधि यज्ञ आणि दान ।
जप तपादि साधन ।
तया किंमत एका काडीहून।
जास्त नाही।।३६९ ।।
शरीरासी तादात्म्य तोडून ।
मन गुणातीत होऊन ।
जीवभाव संपणं ।
कल्याणदायी॥३८१।।
मजसी एकत्व न जाणणे ।
मग वायाचि फुले आणि पाने ।
मजठायी एकरूप होणे ।
तीच भक्ती ।।३९६ ।।
निष्काम ते होता ।
घडे मजठायी एकरूपता ।
म्हणून सत्वर तू आता ।
निष्काम हो।।३९७।।
कर्मसिध्दांत जाणणे ।
जन्ममरण टाळणे ।
मनी निष्काम होणे ।
सूत्र अर्जुना।।४०५ ।।
देहासी तादात्म्य तोडता ।
सुखदुःखी सम राहता ।
स्वप्न सुषुप्ति ओलांडता ।
एकत्व मजसी।।४०६ ।।
अंतरी आम्ही अभेद ।
केवळ नामरूपाचाच भेद ।
नामरूपास जाणे छेद ।
रहस्य अर्जुना ।। ४९९ ।।
पूर्वी वाईट त्यांचे आचरण।
असेना का तो दुर्जन ।
तो मजसी एकत्व पावून ।
मुक्त होई ।।४१६ ।।
जे माझी भक्ती करती।
अंती तया उत्तम गती ।
ते मजसीच पावती ।
आयुष्य सरता।।४१७ ।।
आधी जरी वाईट वागला ।
पण नंतर जो सुधारला ।
तो महापुरातून वाचला ।
अर्जुना जसा ।।४९८ ।।
तो दुराचारी जरी होता ।
पण मनी पश्चाताप प्रकटता ।
होई सर्व पापातून मुक्तता।
त्यांची अर्जुना ।। ४२० ।।
ऐसा पश्चाताप होता ।
पापांचा भोग संपता ।
तथा अंतरी पवित्रता ।
प्रकटे अर्जुना ॥ ४२१ ॥
ऐसे मनबुध्दि सांडता ।
मनी निष्काम होता।
मजसी एकत्व पावता ।
मुक्ती अर्जुना ॥ ४२४ ॥
वाया रूप तारण्याची सुंदरता ।
नि जपतपाची वाच्यता ।
जोवरी नाही मजसी एकता।
ते पाल्हाळ सारे ।। ४३२।।
निंबासी निंबोळ्या आल्या।
त्या कावळ्यांनीच खाल्ल्या।
तसा भक्तिहीन जातो वेढल्या ।
दोषांनीच । ।४३८।।
माझ्यासी एकरूपता ।
तीच जीवनाची सफलता ।
इंद्रिय मनबुद्धि सरता ।
माझी गाठ ॥ ४५५ ॥
म्हणून कुळ जाती वर्ण ।
हे सर्वथा गा अकारण ।
मजसी एकरूप होणं ।
भक्ती आहे।।४५६।।
वनात वणवा पेटला असता ।
का न करावा वाकडा रस्ता ।
आणि टाळण्या ही दुःखता।
करावी भक्ती ॥ ४९२ ॥
जीवपण दुःखाचा डोंगर ।
तेथे मरणाचा वावर ।
टाळून हा दुःखाचा बाजार।
मुक्त व्हावे ।। ४९६ ।।
ऐशा मरणाच्या ठिकाणे ।
कैसे बा सुखी होणं ।
दुःखात सुख शोधणे ।
मूर्खपणा ॥ ४९७ ॥
ऐसी अनित्य जी स्थिती ।
तिजला मूर्ख सुख मानती ।
आणि अखंड जन्ममरण घेती ।
मृत्युलोकी ।।५०७॥
पावण्या मजसी एकता ।
कवडीचीही नाही आवश्यकता।
परि ओतती संपत्ती सर्वथा।
जेथे हानी ।।५०८ ।।
जो विषयात बा गुंतला ।
तया म्हणती सुखी झाला ।
जो इच्छांखाली मेला ।
म्हणती त्यास ज्ञानी ।।५०१ ।।
सर्पाने बेडूक अर्धा गिळला।
तरी तो बेडूक धरू पाहे माशीला ।
तैसे यांच्या लोभाला ।
अंत नाही । ।५१४।।
या मृत्युलोकाच्या ठिकाणी।
सारी उरफाटीच कहाणी ।
अर्जुना येथे जन्मूनी ।
फसलास तू ।।५१५।।
घडण्या मृत्युलोकाचा त्याग।
तू भक्तीच्या वाटेस लाग ।
प्राप्त होता तो योग ।
मीच होशी।।५१६।।
तू मन हे मीचि करी।
माझिया भजनी प्रेम धरी ।
सर्वत्र मज नमस्कारी ।
एकतत्वा।।५१७।।
मजठायी ठेवून अवधान ।
मनोसंकल्प जाऊ दे जळून ।
मजसी मग एकत्व पावून ।
मुक्त होशी ।।५१८।।
🌹🌹🌹🌹
प्रचलित मराठीत ओवीबद्ध ज्ञानेश्वरी निवडक ओव्या :
Download pdf book
✍️ Vijay Pandhare
📳 Phone no:
9822992578
📧 Email:
..................
.jpg)
.jpg)
पोस्ट्स
 प्रचलित मराठीत काव्यबद्ध भावार्थ ज्ञानेश्वरी अध्याय नववा : निवडक ओव्या dnyaneshwari adhyay 9 ){kind=link}
0 टिप्पण्या
Ask your doubt ..